Hoxhaj: Sivjet konsullatat në Munih dhe në Milano

Ministri i Jashtëm i Republikës së Kosovës, Enver Hoxhaj, ka paralajmëruar hapjen e dy konsullatave të reja të Kosovës: një në Milano dhe një në Munih.

Ai po ashtu ka thënë se në vitin që lamë pas, Kosova ka vazhduar forcimin dhe shtrirjen e shërbimit të jashtëm dhe se tashmë janë 22 misione diplomatike, 14 misione konsullore dhe katër konsullata të përgjithshme – tri prej të cilave janë funksionalizuar në vitin 2013: në Strasburg, Stamboll dhe Gjenevë.

“Brenda vitit 2013, në këto misione janë pajisur më shumë se 25 mijë shtetas të Kosovës me pasaportë, derisa rreth 15 mijë me letërnjoftim. Pas fillimit të aplikimit të regjimit të vizave, misioni ynë në Stamboll ka pajisur 620 shtetas të huaj me viza të Republikës së Kosovës. Të gjitha këto flasin për një punë të madhe që është bërë nga stafi i misioneve diplomatike dhe konsullore të Republikës së Kosovës”, ka potencuar Hoxhaj. /Telegrafi/