Hoxhaj rikthehet në krye të diplomacisë
RajoniPress
08:01, 5 Maj, 2016
Ish-ministri i Punëve të Jashtme, Enver Hoxhaj, do të kthehet në krye të diplomacisë kosovare
Kjo është konfirmuar nga ushtruesi i detyrës së kryetarit të PDK-së, Kadri Veseli, i cili të mërkurën në një konferencë për medie ka thënë se Hoxhaj do të jetë bartës i proceseve të jashtme.
Madje, sipas tij, “Hoxhaj ka shumë punë për të bërë në proceset e integrimeve”.
Veseli duke folur për rekomandimin për liberalizimin e vizave për Kosovën ka thënë se PDK-ja ka qenë “lokomotivë” e këtij procesi.
“Urime për gjithë qytetarët e Republikës së Kosovës. Vërtet kjo është një ditë e jashtëzakonshme, një ditë e shënuar. Dëshiroj t’i falënderoj gjithë qytetarët e vendit për durimin që kanë treguar dhe në të njëjtën kohë edhe për përkushtimin. Partia Demokratike e Kosovës ka qenë dhe është lokomotivë e këtij procesi”, ka deklaruar Veseli.
Sipas tij, tani po i jepet fund izolimit ndërkombëtar të Kosovës, shkruan sot gazeta “Zëri”.
“Dëshiroj me këtë rast të falënderoj ish-kryeministrin e Republikës së Kosovës dhe gjithë ministrat e Integrimeve, të cilët kanë bërë një punë të jashtëzakonshme, ministrat e Brendshëm e gjithsesi edhe ministrat e Jashtëm. Kjo është një epokë e re, e cila i jep fund izolimit ndërkombëtar të Kosovës, veçanërisht lëvizjen e lirë, rrëzimi i fundit i murit të Berlinit në Evropë”, ka shtuar Veseli.
Ndërsa nënkryetari i PDK-së, Enver Hoxhaj, ka thënë se rekomandimi për liberalizmin e vizave është akti i parë në rrugën tonë të rikthimit në Evropë.
“Gjitha qeveritë e udhëhequra nga Partia Demokratike e Kosovës, kryeministri Thaçi dhe shumë kolegë në Qeveri dhe Qeveria aktuale kanë bërë një punë brilante në përmbushjen e kritereve. Ju e dini që në krahasim me vendet e tjera të rajonit, të cilat kanë pasur 43 ose 45 kritere, Republika e Kosovës i ka pasur 101 kritere që t’i përmbushë. Ka qenë një proces i gjatë, i vështirë, por është një e arritur e madhe dhe megjithatë është një meritë e qytetarëve të Kosovës”, ka theksuar Hoxhaj.
Përndryshe, Hoxhaj ka qenë ministër i Punëve të Jashtme të Kosovës gjatë viteve 2011-2014, ndërsa pas zgjedhjeve të parakohshme parlamentare të vitit 2014 në krye të MPJ-së ishte Hashim Thaçi, i cili që nga muaji i kaluar është në krye të shtetit të Kosovës.
