Hoxhaj: PDK-ja shkon në seancë, por vetëm kur ta thërret Brovina

Nënkryetari i Partisë Demokratike të Kosovës, Enver Hoxhaj në një prononcim për Indeksonline tha se partia e tij do të shkoj vetëm në seancën e ftuar nga deputetja më e vjetër e kësaj legjislature, Flora Brovina.

Hoxhaj vlerëson se pikërisht Brovina është e vetmja që mund ta thërras vazhdimin e një seance të tillë.

“Mendoj që në bazë të rregullores së Kuvendit dhe në bazë të vendimit të Gjykatës Kushtetuese, të cilat janë kornizat e vetme legale për çdo veprim politik, i vetmi institucion që mund ta ftoj seancën e radhës është Flora Brovina”, tha ai.

Madje, ai i bënë me dije bllokut se nuk mund ta ndryshoj këtë.

“Kjo nuk ndryshon asgjë se çfarë partitë politike mund të kenë agjendë të tyre. Kjo vlen edhe për bllokun edhe për PDK-në”, tha ai.

Hoxhaj i sugjeron bllokut që të koordinohet me kryesuesen aktuale, në rast se donë seancë.

“Pra kjo i takon vetëm Flora Brovinës që të ushtroj të drejtën e saj që ajo ta ftoj seancën. Blloku duhet të koordinohen me Flora Brovinën”, tha nënkryetari i PDK-së për Indeksonline.

Në fund, Hoxhaj bëri me dije, se PDK nuk do të shkoj në asnjë seancë, që nuk është thirr nga Brovina.

“Ne shkojmë në çdo seancë që e fton Flora Brovina. Cdo seancë tjetër jashtë ftesës e cila nuk vjen nga Flora Brovina, për mendimin tim, është lëndim i rregullores të Kuvendit”, tha Hoxhaj.