Hoxhaj: Mbetem i palëkundur për shtetin evropian dhe laik të Kosovës

Ministri në detyrë i Punëve të Jashtme, Enver Hoxhaj, ka reaguar në lidhje me kërcënimet që kanë ardhur në adresë të tij nga Forumi i të Rinjve Muslimanë. Hoxhaj, përmes një postimi në Facebook, ka thënë se mbetet i palëkundur në përkushtimin e tij për shtetin evropian dhe laik të Kosovës.

“Kërcënimet e të ashtuquajturit Forumi i të Rinjve Musliman dhe ithtarëve të tij janë të shpeshta në vitet e fundit dhe ofenduese në drejtim të personalitetit tim. Lajmin më të mirë ky i ashtuquajtur Forum dhe ithtarët ideolgjik të tyre do ta marrin së shpejti përmes miratimit të Ligjit për Terrorizmin në Qeverinë dhe Kuvendin e Kosovës. Ky është edhe përkushtim i shtetit tonë për ta luftuar këtë të keqe përkrah vendeve aleate dhe partnere. Asnjëherë nuk jam dorëzuar përball kërcënimeve të tilla dhe do të vazhdoj përkushtimin tim si politikan dhe qytetar për një shtet laik dhe të së drejtës që ka orientim vlerat euro-atlantike”, ka shkruar Hoxhaj.

Ai ka thënë gjithashtu se aksioni policor i të hënës për arrestimin e dhjetëra të dyshuarve për terrorizëm ka qenë i drejt dhe në shërbim të ruajtjes së sigurisë të qytetarëve të Kosovës.

“Në vazhdimësi kam mbrojtur interesin shtetëror të Kosovës duke u pozicionuar qartë për temën e radikalizmit fetar që nga vendimi si i ish Ministër i Arsimit për ndalimin e bartjes së shamisë në shkolla, parandalimin e mësimit fetar në shkolla dhe qëndrimin e hershëm për ta mbështetur një pako ligjore që e sanksionon pjesëmarrjen në luftëra jashtë Kosovës. Mbetem i palëkundur në përkushtimin tim për shtetin evropian dhe laik të Kosovës”, është shprehur ministri në detyrë i Punëve të Jashtme, Enver Hoxhaj