Hoxhaj kërkon njohje nga shtetet e Afrikës

Ministri i Jashtëm i Enver Hoxhaj, ka kërkuar nga shtetet e pjesëmarrëse në Organizatën e Frankofonisë që ta njohin Kosovën.

Hoxhaj i cili po merr pjesë në Samitin e 15-të me radhë të kësaj organizate, që po zhvillon punimet në Senegal të Afrikës, ka takuar ministrat e jashtëm dhe shefat e delegacioneve të vendeve që nuk e kanë njohur Kosovën.

Në takimet me ministrat e jashtëm të Malit, Abdoulaye Diop, atë të Madagaskarit, Arisoa Lala Razafitrimo, të Seishellit, Jean Paul Adam dhe shefat e delegacioneve nga Maroku dhe Libani, Hoxhaj i ka informuar për zhvillimet pozitive në Kosovë dhe nevojën e njohjes së pavarësisë nga këto vende në mënyrë që të ecet më tutje në raportet diplomatike me këto shtete, thuhet në një komunikatë të MPJ-së.

“Në takimet e ndara në margjina të Samitit të Frankofonisë, pata rastin të takoj dhe kërkoj njohjen e Kosovës nga ministrat e jashtëm të shumë vendeve sikurse Mali, Madagaskari, Seishellit dhe shefat e delegacioneve nga vende të tjera, të cilat tanimë janë të njohura me rastin dhe të arriturat e Kosovës. Jam optimist për vendime pozitive”, ka thënë Hoxhaj, pas takimeve.

Shefi i diplomacisë kosovare, po ashtu ka takuar edhe ministrin e Jashtëm të Senegalit, shteti i të cilit është organizator i Samitit të Frankofonisë, ministrat e Haitit, të Chadit dhe delegacione të tjera të cilat i ka falënderuar për njohjen dhe mbështetjen që po vazhdojnë të japin për Kosovën.