Hiqen dilemat për doktoraturën e ish-prorektores

Ishte gabim teknik. Kaq ishte sqarimi që Universiteti Shtetëror i Tetovës (USHT) i ka dhënë ish-prorektores së Universitetit të Prishtinës Minevere Morina-Rashiti, të cilës, sipas një shkrese të USHT-së, që i ishte adresuar ambasadës së Kosovës në Shkup i kontestohej doktoratura. Por, pas sqarimeve shtesë që kishte kërkuar Morina-Rashiti, kur shkresa për të kishte mbërritur edhe në rektoratin e UP-së, Universiteti i Tetovës ka ndryshuar qëndrimin, duke thënë se Morina-Rashiti ka fituar gradën doktor i shkencave të sociologjisë.

Çuditërisht dokumenti për profesoreshën Morina-Rashiti, ka mbërritur në Prishtinë në kohën kur ajo ishte njëra nga kandidatet për dekane të Fakultetit të Mjekësisë, ku garën e kishte fituar ish-ministri Ethem Çeku.

Gazeta ka tentuar që të kontaktojë me përfaqësuesit e Universitetit të Tetovës edhe përmes telefonit edhe përmes adresës elektronike. Por ata për disa ditë rresht nuk i janë përgjigjur kërkesave të gazetës.

Kurse Minevere Morina-Rashiti ka thënë se procedura e arritjes së doktoraturës është në përputhshmëri me të gjitha kriteret e parashtruara të USHT-së, dhe për këtë ajo posedon edhe certifikatën që vërteton se ajo ka marrë gradën doktor i shkencave të sociologjisë.(Tribuna)