Hetimi i SHIK-ut në dilemë

Deputeti i “Vetëvendosjes”, Florin Krasniqi, duket se ka dështuar në nismën e tij për ngritjen e një komisioni të veçantë hetimor parlamentar për hetimin e Shërbimit Informativ të Kosovës (SHIK), dhe shërbimeve tjera sekrete të partive politike.

Krasniqi edhe pas dy muajsh të iniciativës së tij për krijimin e një komisioni hetimor parlamentar për hetimin e SHIK-ut, duke mos amnistuar edhe shërbimet informative sekrete të partive politike, ka arritur t’i mbledhë vetëm 22 nënshkrime, nga 40 sa kërkohen.

Sipas tij, problem kryesor se pse iniciativa e tij ka mbetur në gjysmë të rrugës, është mospërkrahja e partisë më të madhe opozitare, LDK-së, e cila siç ka thënë Krasniqi, konsideron se shërbimet informative duhet të hetohen nga Prokuroria dhe jo nga Kuvendi i Kosovës.

Por, jo vetëm nisma e deputetit të Vetëvendosjes, nuk po arrin sukses, pasi që edhe iniciativa e parë e deputetit të AAKsë, Burim Ramadani, ka dështuar për mungesë të mbështetjes nga deputetët e legjislativit.

Megjithatë, Florin Krasniqi, i cili është edhe kryetar i Komisionit parlamentar për Mbikëqyrjen e AKIsë, thotë se nuk do të heqë dorë nga nisma e tij për zbardhjen e së vërtetës mbi veprimtarinë 10-vjeçare të SHIK-ut.(zeri)