Hetim parlamentar për “krimet” ndaj LDK-së!

Deputeti i Lidhjes Demokratike të Kosovës, Eqrem Kryeziu, ka deklaruar se tashmë ka shumë prova se ka pasur një fushatë të organizuar për likuidimin e veprimtarëve të LDK-së, prandaj duhet nisur një hetim parlamentar për të sqaruar këto pretendime.

Sipas Kryeziut, kjo do të duhej të bëhej me konsensusin e partitive politike, përndryshe iniciativa do të sabotohej, siç po ndodh në rastin e nismës për zbardhjen e veprimtarisë së SHIK-ut dhe agjenturave tjera joformale.

“Hetimet janë të rëndësishme, sepse ka pasur teori se gjoja në LDK po e vrasin vetveten për ta ngritur çmimin në tregun elektoral”, ka thënë Kryeziu për “Tribuna Shqiptare”.

Sipas tij, nëse tash elektorati ka një alergji ndaj krimit, natyrisht që duhet të preferojë LDK-në – një parti civile, paqësore, e cila është martirizuar.

Kryeziu po ashtu vlerëson se ‘yjet’ e dikurshme të LDK-së, nuk do të thotë se janë shuar, nëse nuk bëjë shpesh paraqitje publike. “Për fat që keq ka edhe zyrtarë që edhe shtetin do ta përmbysnin, nëse nuk do të mund të mbeteshin në karrige”, ka thënë Kryeziu. /Telegrafi/