Hetemaj mbetet te Albinoleffe

Mesfushori kosovar Mehmet Hetemaj në edicionin 2013/14, do të luajë në Kategorinë e Tretë të Italisë (Serie C) me skuadrën e Albinoleffes, shkruajnë të hënën mediumet finlandeze. Hetemaj ka kontratë me Albinoleffen edhe dy vjet dhe drejtuesit e klubit nuk e kanë liruar pa dëmshpërblim.

Vetë Hetemaj ka deklaruar se është shumë i dëshpëruar, pasi gjatë verës ka pasur shumë oferta nga skuadrat italiane që garojnë në Serie B. “Është një dëshpërim shumë i madh për shkak se ka pasur interesim, por klubi nuk ka dashur të bisedojë pa dëmshpërblim”, është shprehur Hetemaj.

Ai edicionin e shkuar luajti i huazuar te skuadra e Regginas, ndërsa në Itali po bën karrierë prej vitit 2009. “Katër edicione kam luajtur në Serie B dhe kam pasur rol të rëndësishëm në mesfushë për ekipin”, tha mesfushori 25-vjeçar. Hetemaj ka zhvilluar edhe dy ndeshje me Përfaqësuesen e Finlandës.