Haxhi Krasniqi: Do ta fitoj titullin botëror

Gazeta “Zëri” të premten e pati një mysafir special, i cili erdhi nga bota e sportit. Fjala është për boksierin kosovar me famë botërore, Haxhi Krasniqi.

Junikasi ka ardhur për të pushuar disa ditë në vendlindje, ndërsa u ndal edhe në Gazetën “Zëri”, ku u prit me kënaqësi nga kryeredaktorja Arbana Xharra dhe kolegjiumi i gazetës.

Krasniqi përgëzoi “Zërin” për punën e shkëlqyeshme që bënë ndër vite dhe e falënderoi për mbështetjen e vazhdueshme që ia ka dhënë, dhe vazhdon t’ia jep, gjatë gjithë karrierës së bujshme të tij.

Kurse, “Zëri” i premtoi Krasniqit dhe gjithë tifozëve të tij se edhe në të ardhmen do të vazhdojë t’i mbajë afër përmes lajmeve, raportimeve dhe intervistave të ndryshme.

Pasi i pa nga afër ambientet e redaksisë së “Zërit”, Krasniqi nga aty ua bëri me dije tifozëve shqiptarë se nuk është dorëzuar nga synimi jetësor i tij për ta fituar titullin e kampionit botëror, ani pse deri më tani i ka lëshuar dy shanse ideale.

Edhe pse ka humbur në dy beteja për titull botëror, Krasniqi ndihet krenarë më karrierën e tij.