Hashimi merr fjalën, Vetëvendosje braktis sallën

Në momentin kur presidenti i vendit Hashim Thaçi ka nisur fjalimin e tij lidhur me Demarkacionin, sallën e kanë lëshuar deputetët e opozitës.

Kanë qenë deputetët e Lëvizjes Vetëvendosje ata të cilët janë parë të parët tek janë ngritur nga ulset dhe kanë dalë nga salla.

Në këtë tryezë ku po mbahet debati i Demarkacionit pritet të flasë edhe ambasadori amerikan Greg Delawie./Telegrafi/

Thaçi: Ky debat i ka munguar Kosovës, tash e një vit

Presidenti i vendit, Hashim Thaçi gjatë fjalimit të tij në debatin për demarkacionin me Malin e Zi tha se ky debat i ka munguar Kosovës, tash e një vit.

“Kam nderin dhe kënaqësinë që të kontribuoj në këtë debat sot. Më lejoni që në fillim të vlerësoj iniciativën tuaj për të zhvilluar këtë debat, që Kuvendit të Kosovës, por edhe tërë opinionit publik në Kosovë t’i prezantohen faktet rreth procesit të demarkacionit të kufirit të Republikës së Kosovës me Republikën e Malit të Zi. Ky debat i ka munguar Kosovës, tash e një vit. Kjo do ta rritë edhe më shumë transparencën e këtij procesi”, tha Thaçi.

Ai tha se kjo gjithsesi që do të sjellë vendime të bazuara në informata të drejta dhe të plota, në dobi të Kosovës dhe të qytetarëve të saj.

“Që në fillim dua të theksoj se çështja e demarkacionit si problem shtetëror është inekzistent”, u shpreh Thaçi. /Telegrafi/