Hargreaves: Siguria evropiane është në zemër të miqësisë Kosovë-Britani

Ambasadori i Mbretërisë së Bashkuar në Kosovë, Jonathan Hargreaves, ka vlerësuar miqësinë e thellë mes Kosovës dhe Britanisë së Madhe, duke theksuar se partneriteti në fushën e sigurisë evropiane qëndron në qendër të kësaj marrëdhënieje.

Ai ka rikonfirmuar mbështetjen e vazhdueshme të Mbretërisë së Bashkuar për zhvillimin dhe avancimin e Forcës së Sigurisë së Kosovës (FSK).

Hargreaves bëri të ditur se ka zhvilluar diskutime me Komandantin e FSK-së, gjeneral Bashkim Jasharin, dhe Ministrin në detyrë të Mbrojtjes, Ejup Maqedoncin, ku fokusi kryesor ishte forcimi i bashkëpunimit në fushën e sigurisë, si një nga shtyllat kryesore të partneritetit mes Londrës dhe Prishtinës.

“Siguria evropiane është në zemër të miqësisë së thellë midis Mbretërisë së Bashkuar dhe Kosovës. Rikonfirmuam përkushtimin tonë për të mbështetur zhvillimin e vazhdueshëm të FSK-së, përafrimin e saj me standardet dhe strukturat e NATO-s, si dhe forcimin e bashkëpunimit me Forcat e Armatosura të Mbretërisë së Bashkuar”, ka deklaruar Hargreaves.

Ai ka shtuar se bashkëpunimi në sektorin e sigurisë po kontribuon në ndërtimin e një të ardhmeje më të qëndrueshme dhe më të sigurt për Kosovën dhe rajonin e Ballkanit Perëndimor.