Hapet dëgjimi publik për transportin urban

Gjilan -Komuna e Gjilanit është duke u përgatitur që të fillojë me transportin urban nga fundi i këtij viti, ose fillimi i vitit tjetër.

Për t`iu dhënë mundësi qytetarëve që të shprehin mendimet e tyre për transportin urban, këtu është hapur edhe dëgjimi publik dy ditor, i cili po mbahet në sallën e Teatrit të Qytetit, nga ora 12:00 – 16:00.

Transporti urban do të dizajnohet sipas nevojave të qytetarëve. Pasi që është projekt i rëndësishëm dhe shumë kompleks në kuadër të strategjisë për mobilitet, komuna e Gjilanit po ndihmohet nga ekspertët amerikanë të qytetit Golden të Kolodarës, të cilët kanë një përvojë të admirueshme në këtë fushë, ka thënë Omer Daku, nënkryetar i Komunës, në hapje të dëgjimit publik.

Ai nënvizoi se qytetarët kanë mundësi që t`i japin idetë, sugjerimet dhe zgjidhjet e tyre sa u përket vijave të transportit urban, vendndalimeve të autobusëve, parkingjeve, rrugëve dhe trotuareve, ka thënë Omer Daku, njëherësh kryesues i grupit për mobilitet.

Qytetarët do të vendosin se a kemi nevojë për një transport urban, apo jo, ka thënë Daku, duke nënvizuar se nëse gjithçka shkon siç duhet, atëherë nga fundi i këtij viti, ose fillimi i vitit të ardhshëm, në Gjilan mund të fillojë transporti urban.

Ky projekt mundësohet nga USAID-DEMI dhe me vete ka tre ekspert amerikan Dan Hartman,Rick Muriby dhe Anne Beierle nga qyteti Golden-Colorado./rajonipress/

Shpërndaje.
© RAJONIPRESS