Haliti viziton stadiumin e qytetit në Viti, paralajmëron investime të reja në sport

Viti – Kryetari i Komunës së Vitisë, Sokol Haliti, ka zhvilluar sot një vizitë në Stadiumin e Qytetit, ku është njohur nga afër me gjendjen aktuale dhe nevojat për investime në këtë hapësirë sportive.

Gjatë vizitës, i shoqëruar nga drejtori për Kulturë, Rini dhe Sport, Valmir Sahiti, drejtori i Shërbimeve Publike, Arton Musliu, si dhe bashkëpunëtorë të tjerë, Haliti ka theksuar përkushtimin institucional për përmirësimin e vazhdueshëm të infrastrukturës sportive.

Ai bëri të ditur se në periudhën e ardhshme priten investime konkrete në stadiumet e komunës, me synim krijimin e kushteve më të mira për klubet sportive dhe për të rinjtë që merren me aktivitete fizike. Ndërkohë, së shpejti pritet të nisin edhe procedurat për rregullimin e tribunave të stadiumit të KF Vllaznia Pozheran.

Paralelisht, janë duke vazhduar punimet në palestrat sportive shkollore, përfshirë ato në Gjimnazin “Kuvendi i Lezhës” në Viti dhe në Sllatinë të Epërme.

Nga Komuna e Vitisë theksohet se investimet në sport do të mbeten prioritet, me qëllim të rritjes së pjesëmarrjes së të rinjve dhe zhvillimit të jetës sportive në komunë./rajonipress/