Haliti uron besimtarët katolikë për Pashkë: Paqe, harmoni dhe shpresë në çdo familje

Viti – Në prag të festës së Pashkëve Katolike, kryetari i Komunës së Vitisë, Sokol Haliti, ka përcjellë një mesazh urimi për të gjithë besimtarët katolikë, duke theksuar rëndësinë e kësaj feste për reflektim dhe afrim mes njerëzve.

Në urimin e tij, Haliti shprehu dëshirën që kjo festë të sjellë gëzim, paqe dhe harmoni në çdo familje, duke i inkurajuar qytetarët që ta kremtojnë pranë më të dashurve të tyre.

Ai theksoi se Pashkët përfaqësojnë një moment të veçantë shpirtëror, që fton në dashuri, solidaritet dhe mirëkuptim, duke e cilësuar këtë ditë si një mundësi për të forcuar lidhjet njerëzore dhe për të ndarë vlera pozitive në shoqëri.

“Le të jetë kjo ditë e bekuar një mundësi për të përçuar dashuri dhe për të ndarë lumturinë me të gjithë ata që na rrethojnë,” thuhet në mesazhin e tij urues.

Në fund, kryetari Haliti uroi që kjo festë të kremtohet me shëndet dhe begati, duke iu drejtuar besimtarëve me urimin tradicional: “Për shumë mot gëzuar Pashkët!”.