Haliti priti në takim KFOR-in amerikan në Viti, bashkëpunimi i shkëlqyeshëm është në interes të të gjithë vitiasve pa dallim

Viti – Sokol Haliti tha se ai dhe qeverisja e tij, do të vazhdojnë bashkëpunimin e shkëlqyeshëm me këtë ekip edhe në këtë vit, pasi që kjo është në interes të të gjithë qytetarëve vitias pa dallime

Kryetari i komunës së Vitisë, Sokol Haliti, ka pritur në një takim Ekipin për Monitorim dhe Ndërlidhje të KFOR-it amerikan (LMT), në Viti, të përfaqësuar nga togeri Shaën Stachula dhe rreshteri i stafit Ikëan Avilez.

Gjatë këtij takimi, përfaqësuesit ushtarak pos që kanë bashkëbiseduar për zhvillimet e gjithëmbarshme në komunën e Vitisë, ata kanë shfrytëzuar rastin për ta uruar kryetarin Haliti për vitin e ri 2023, dhe e kanë falënderuar për bashkëpunimin e shkëlqyeshëm, respektin dhe mikpritjen.

Togeri Stachula bëri me dije se për shkak të ndërrimit të misionit për të, ai më nuk do të jetë në Viti dhe e njoftoj Halitin me rreshterin Avilez, i cili tani do ta zëvendësoj atë.

Në shenjë respekti për kontributin e dhënë, Haliti i ndau një mirënjohje togerit Stachula, duke e vlerësuar lartë kontributin e tij dhe të ushtarëve amerikan në komunën e Vitisë.

Ndërkaq, Haliti tha se ai dhe qeverisja e tij, do të vazhdojnë bashkëpunimin e shkëlqyeshëm me këtë ekip edhe në këtë vit, pasi që kjo është në interes të të gjithë qytetarëve vitias pa dallime. Edhe ai urojë atyre fillimin e këtij viti./rajonipress/