Haliti: Mërgata shqiptare në Graz, urë bashkëpunimi mes Kosovës dhe Austrisë

Viti – Gjatë vizitës në qytetin e Grazit, pata rastin të takohem me përfaqësues të mërgatës shqiptare, të cilët përmes angazhimit të tyre të vazhdueshëm po japin një kontribut të çmuar në ruajtjen e identitetit kombëtar dhe në forcimin e lidhjeve institucionale ndërmjet Republikës së Kosovës dhe Austrisë ka shkruar Sokol Haliti.

Postimi i plotë:

Në kuadër të këtyre takimeve, u zhvillua edhe një bashkëbisedim i veçantë me z. Arsim Gjergji, këshilltar i qytetit të Grazit, ansambleist dhe kryetar i Këshillit Koordinues të Shoqatave Shqiptare në Shtajermark dhe Karnten. Ky këshill përfshin rreth 17 shoqata të regjistruara, duke e bërë një nga strukturat më të organizuara dhe më përfaqësuese të komunitetit shqiptar në Austri.

Përveç angazhimit të tij publik dhe institucional, z. Gjergji, së bashku me familjen, është i suksesshëm edhe në sektorin e gastronomisë, duke dëshmuar përkushtim, përgjegjësi dhe integrim të shkëlqyer në shoqërinë austriake. Ai përfaqëson një shembull domethënës të suksesit të mërgatës shqiptare, ku puna, korrektësia dhe angazhimi qytetar shndërrohen në vlera të mirëfillta të bashkëjetesës dhe kontributit shoqëror.

Si qytetar me prejardhje nga komuna jonë, Arsim Gjergji mbetet një urë lidhëse ndërmjet vendlindjes dhe diasporës, duke dëshmuar rolin e rëndësishëm të mërgatës në jetën publike, institucionale dhe ekonomike të Austrisë, një vend mik dhe partner i rëndësishëm i Kosovës./rajonipress/