Haliti i LDK-së dhe Arifi i PDK-së në balotazh

Viti – Sipas rezultatit të publikuar nga shtabi zgjedhore i LDK-së, në garën për kryetar komune ka fituar Sokol Haliti, kandidat i LDK –së me rreth 43 për qind, i cili do të përballet në balotazh me Nexhmedin Arifin e PDK-së, i cili ka fituar rreth 23 për qind të votave. I treti është kandidati i Vetëvendosjes, Salih Salihu me rreth 21 për qind.

Sokol Haliti, ka thënë që beson se ai do të jetë fitues edhe në balotazh dhe që në Viti do të rikthehet qeverisja e LDK-së.

Rezultatin zgjedhor të publikuar nga LDK-ja e konfirmoi edhe shtabi i PDK-së, i cili nuk jep shifra konkrete ,por thekson se kandidati i PDK-së shkon në balotazh. Shtabi Zgjedhor i PDK-së në Viti, po ashtu, parasheh që të jetë fituese në balotazh.

Shtabi Zgjedhorë i Partisë Demokratike të Kosovës, dega në Viti, në bazë të rezultateve ne teren, konstaton kalimin në balotazh. “Kalimi ynë në balotazh, respektivisht në raundin e dytë, është rezultat i angazhimit të jashtëzakonshëm të të gjithë aktivistëve të PDK-së, duke pas parasysh sabotazhin averziv të disa relikteve politike në Viti. Sigurisht se ne do të shënojmë fitore të sigurt në raundin e dytë dhe kësisoj do të vazhdojmë me vizionin evropian të qytetit tonë. I falënderojmë të gjithë ata që kanë kontribuar në kalimin e këtij testi të demokracisë, ku natyrisht kontribut të madh kanë dhënë të gjithë qytetarët e komunës së Vitisë” thuhet në njoftimin e PDK-së./rajonipress/