Haliti bashkëbisedon me pensionistët në Viti, fokus te përmirësimi i shërbimeve për të moshuarit

Viti – Në kuadër të bashkëpunimit të vazhdueshëm me Caritas Kosova, Kryetari i Komunës së Vitisë, Sokol Haliti, ka zhvilluar një takim me persona të moshuar dhe përfaqësues të shoqatave të pensionistëve nga rajoni i Vitisë.

Në këtë takim morën pjesë edhe drejtori për Shëndetësi dhe Mirëqenie Sociale, Halil Musliu, drejtoresha e QKMF Viti, Vjollca Kadolli, si dhe drejtori i Caritas Kosova, Pal Baftijaj.

Gjatë bashkëbisedimit u diskutuan nevojat dhe sfidat me të cilat përballen të moshuarit, si dhe mundësitë për avancimin e shërbimeve dhe rritjen e mbështetjes institucionale për këtë kategori të shoqërisë.

Haliti theksoi se të moshuarit përbëjnë një vlerë të çmuar për komunitetin dhe se institucionet lokale do të vazhdojnë angazhimin me projekte konkrete në funksion të përmirësimit të mirëqenies së tyre./rajonipress/