Halimi po bënë emër në Gjermani

Stuttgart – Pas vetëm 30 minutave, ndeshja mes Stuttgarter Kickersit e Hansa Rostockut që bëjnë gara në Ligën e tretë të Gjermanisë, ishte e vendosur. Meritat më të mëdha për këtë fitore i shkuan në adresë mesfushorit të ri, Besar Halimi (19) që ishte direkt i përfshirë në dy gola. Halimi shënoi golin e epërsisë dhe asistoi në një tjetër, duke bërë që Stuttgarter Kickersi të forcohet në pozitën e dytë në tabelë me 24 pikë të mbledhura pas 13 ndeshjeve të zhvilluara.
Ndeshja u mbyll me shifrat 3:0.

Halimi, i cili para fillimit të këtij edicioni iu bashkua Kickersave nga skuadra e Stuttgartit, po shkëlqen. Ai deri më tani ka shënuar dy gola dhe gjithashtu ka shpërndarë tetë asistime për bashkëlojtarët.

“Nëse vazhdojmë të luajmë me këtë formë, atëherë do t’i mposhtim të gjithë kundërshtarët”, thotë Halimi, i cili prej vitit 2009 deri në vitin 2013 ishte pjesë e skuadrës së Nurnbergut. “Po ashtu jam shumë i kënaqur me formën time si dhe me besimin që po e ka trajneri për mua”. (Koha Ditore)
© KOHA.net