Halimi: Lugina po zbrazet

Gjilan – Deputeti i vetëm shqiptarë në Parlamentin e Serbisë Riza Halimi thotë për rajonipress se Lugina e Preshevës pos që po diskriminohet në të gjitha fushat e jetës ajo ka filluar edhe të zbrazet. Kushtet e rënda ekonomike, pa perspektiva dhe pasiguria detyrojnë shumë shqiptarë të largohen nga Lugina ka thënë Halimi.

Riza Halimi ka vite që flet guximshëm për zhvillimet në rajon e në Luginë. Ai tashmë ka krijuar një institucion në vete të deklarimeve rreth këtyre ngjarjeve dhe me të drejtë pesha e fjalëve të tij është e madhe, raporton rajonipress.

Edhe në takimin me Lutfi Hazirin që pati në Gjilan, Halimi ka trajtuar temat që janë thelbësore për shqiptarët e Luginës. Halimi shpëtim të vetëm për të ruajtur gjeneza e shqiptareve të Luginës dhe për të qenë ajo e qëndrueshëm dhe e zhvilluar e sheh tek dy qeveritë shqiptare në Tiranë e Prishtinë.

“Ky është rasti jonë i madh dhe i fundit që të ndërhyhet nga dy qeveritë dhe të krijojnë Fondin e shumëkërkuar” tha Halimi.

Por krahas kësaj Halimi ka një shqetësim të brendshëm dhe një brengosje që thotë se po shndërrohet në dukuri. “Lugina e Preshevës pos që po diskriminohet në të gjitha fushat e jetës ajo ka filluar edhe të zbrazet. Kushtet e rënda ekonomike, pa perspektiva dhe pasiguria detyrojnë shumë shqiptarë të largohen nga Lugina” tha Halimi për rajonipress.

Halimi tha se preshevarët pos që mësyjnë Kosovën dhe qytetet e saja për të jetuar ata janë shumë të pranishëm edhe në diasporë.”Jo vetëm ne atje, por edhe institucionet e Kosovës dhe të Shqipërisë nuk duhet të lejojnë që të ndodhë kjo zbrazje. Hapja e një Universiteti në qytetet e Luginës, funksionalizmi i një spitali modern dhe investimet në fushat e caktuara të kulturës, ekonomisë e informimit janë çështje kruciale që duhet të zhvillohen sa më shpejt” tha Halimi./rajonipress/