Halil Murati nga Gjilani kërkon ndihmë për djalin e sëmurë: “Jemi lodhur, por nuk dorëzohemi”

Gjilan – Halil Murati, një qytetar i moshuar nga Gjilani, u drejtohet institucioneve të mirëqenies sociale me një thirrje të dhimbshme për ndihmë. Djali i tij, Hevziu, 48 vjeç, vuan nga probleme të rënda mendore dhe nuk është në gjendje të ushqehet apo të lëvizë i vetëm, duke pasur nevojë për përkujdesje të vazhdueshme.

Për shkak të aftësive të kufizuara, Hevziu përkujdeset çdo ditë nga nëna e tij, e cila po ashtu është në moshë të shtyrë dhe e ka gjithnjë e më të vështirë ta përballojë këtë barrë fizike dhe emocionale. Familja jeton me ankth të përditshëm dhe me frikën se nuk do të mund t’i përgjigjen më nevojave bazike të djalit të tyre.

“Jemi bërë kurban i djalit tonë,” thotë Halil Murati me zë të dridhur. “Ai aktualisht merr 150 euro në muaj, por kjo shumë është e pamjaftueshme. Po kërkoj nga shteti që të na paguhet një përcjellës, e në këtë rast është gruaja ime, sepse ajo kujdeset për të 24 orë në ditë.”

Sipas familjarëve, Hevziu nuk është në gjendje të kryejë as nevojat më elementare personale dhe kërkon mbikëqyrje të vazhdueshme. Kjo situatë ka rënduar jo vetëm gjendjen shëndetësore të prindërve, por edhe gjendjen e tyre ekonomike dhe psikologjike.

“Edhe unë kam kontribuar për këtë shtet,” shton Halil Murati. “Nuk po kërkoj lëmoshë, po kërkoj të na dëgjohet halli i madh që e kemi. Kërkojmë vetëm dinjitet dhe mbështetje minimale për të mbijetuar.”

Rasti i familjes Murati nxjerr në pah sfidat me të cilat përballen shumë familje në Kosovë që kujdesen për persona me aftësi të kufizuara, duke ngritur pyetje të rëndësishme për mbështetjen institucionale, politikat sociale dhe ndjeshmërinë ndaj kategorive më të cenueshme të shoqërisë./rajonipress/