Gratë e Kamenicës hartojnë planin e aktiviteteve dhe iniciativave për vitin 2027

Gjilan – Gratë e Komunës së Kamenicës kanë zhvilluar një takim të përbashkët, ku janë diskutuar rezultatet e punës së deritanishme dhe janë propozuar iniciativa të reja për fuqizimin e pozitës së gruas në shoqëri gjatë vitit 2027.

Takimi u udhëhoq nga kryesuesja e Grupit të Grave të Komunës së Kamenicës, Burbuqe Leka, e cila prezantoi raportin e punës dhe rezultatet e arritura. Në këtë takim morën pjesë përfaqësuese të grave nga fusha të ndryshme, përfshirë edhe sektorin e biznesit.

Gjatë diskutimeve u plotësua dhe u pasurua Plani i Veprimit për vitin 2027, me aktivitete dhe iniciativa të reja që synojnë avancimin e rolit të grave dhe krijimin e mundësive më të mëdha për përfshirjen e tyre në jetën shoqërore dhe ekonomike.

Takimi u mbështet nga Misioni i OSBE-së në Kosovë, ndërsa idetë dhe propozimet e pjesëmarrëseve do të shërbejnë si bazë për planifikimin e aktiviteteve të ardhshme./rajonipress/