Gramoz Kurtaj, shqiptari që po shkëlqen në Skoci

Futbollistët shqiptarë vazhdojnë shkëlqimin anë e mbanë Evropës dhe jo vetëm kaq, pasi ka prej tyre që luajnë me sukses edhe në Kinë, Malajzi, Australi e Amerikë.Gramoz Kurtaj është futbollisti më i ri shqiptar, që ka filluar t’i radhisë sukseset në Evropë, dhe tani në një ligë që pak shqiptarë janë aktivizuar më parë.

Mesfushori i talentuar, është transferuar këtë edicion në Hamilton që bënë gara në Ligën Premier të Skocisë, dhe menjëherë ka fituar zemrat e tifozëve të klubit bardh e kuq.

24-vjeçari luan në pozitën e mesfushorit ofensivë dhe në pesë takimet e para në elitën e futbollit skocez ka shkëlqyer duke shënuar një gol dhe duke asistuar në një tjetër.

Sikur mos të mjaftonte kjo, në ndeshjen e fundit në fitoren 3-2 ndaj Heart, Kurtaj pasi shënoi u zgjodh në formacionin më të mirë në Skoci si dhe lojtari më i mirë i javës.

Edhe pse djaloshi prishtinas ka pasaportë gjermane, ai është i gatshëm për ta përfaqësuar kombëtaren shqiptare në futboll, ndërsa shpresojmë që talenti i tij do të vërehet nga krerët e FSHF-së dhe nuk do të shkoj dëm.

Urojmë që Kurtaj të vazhdoj shkëlqimin e tij dhe një ditë të jetë pjesë e Kombëtares së Shqipërisë që çdo ditë e më shumë po na bënë krenar. /Telegrafi/