Grabovci&Co i bien pishman

Zëvendëskryeministri në dorëheqje, Hajredin Kuçi deri në fund të kësaj jave do të rrijë në “ethe” nëse shefi i tij, kryeministri Hashim Thaçi do ta pranojë apo jo dorëheqjen.

Kjo për faktin se Kodi Penal bashkë me nenet 37 dhe 38 ka gjasë që të rikthehet në Kuvend për rivotim qysh në seancën e radhës që pritet të mbahet në fund të kësaj jave.

Kodi mund të rikthehet nëse Kryesia e Kuvendit miraton iniciativën e Grupit parlamentar të Partisë Demokratike të Kosovës, që për shkak të parregullsive, nenet e shumëpërfolura të riformulohen.

“Nëse do të mbahet mbledhja e rregullt e Kryesisë së Kuvendit dhe pritet që të dorëzohet kërkesa e Grupit parlamentar të PDK-së nga shefi i grupit, Adem Grabovci për riformulimin e neneve, kërkesë e cila ka qenë edhe në seancën e kaluar”, ka sqaruar një zyrtar i lartë i afërt me këtë proces.

Mbi këtë arsyetim, sipas të njëjtit, Kryesia ka bazë ligjore që të rikthejë në Kuvend Projekt-Kodin Penal. “Ky propozim i PDK-së, sipas të gjitha gjasave, do të dalë për votim dhe si i tillë nuk do të kalojë për shkak se shumica e deputetëve janë të pajtimit që këto nene të hiqen në tërësi e jo të riformulohen.
Edhe pse kjo kërkesë e PDK-së nuk do të miratohet, është obligim ligjor që Kodi të kthehet në rivotim dhe si i tillë të miratohet pa këto nene”, ka sqaruar më tutje ky zyrtar.(Zeri)

Shpërndaje.
© RAJONIPRESS

Vërejtje!

RajoniPress.com nuk do të botojë shkrime që nuk i përmbushin kriteret dhe standardet profesionale të gazetarisë bashkëkohore. Nuk do të ketë për askënd mbyllje apo censurë, por jemi të fokusuar që në këtë agjenci, lajmi, shkrimi, raporti, intervista dhe opinioni të plotësojnë kriteret profesionale. Gjithashtu opinionet, analizat, komentet, nuk duhet të shkelin parimet etike (gjuhën e urrejtjes, fyerjet, diskriminimet e çfarëdoshme).