Gjykohet grupi shqiptaro – serb që kontrabandoj migrant

Gjilan – Në Gjykatën e Qarkut në Gjilan ka filluar procesi gjyqësor ndaj Blerim Rexhepit, Defrim Zylfiut dhe Sonja Ristiq (police), të akuzuar për veprën penale kontrabandimi me migrant.

Në Gjykatën e Qarkut në Gjilan ka nisur një proces gjyqësor ku në të është e përfshirë edhe një pjesëtare e policisë së Kosovës. Në bankën e të akuzuarve dhe para trupit gjykues që po e kryeson gjykatësi Hasan Sadiku janë paraqitur të akuzuarit Blerim Rexhepi menaxher në restorant “Astor” në Gjilan, Defrim Zylfiu nga Gjilani dhe Sonja Ristiq me profesion zyrtare e policisë së Kosovës.

Në dy seancat e mbajtura të enjten dhe të premten të akuzuarit i kanë mohuar veprat. Në aktakuzën e përfaqësuar nga prokurori publik i Qarkut Afrim Shefkiu thuhet se të pandehurit që nga data 10 maj 2012 në mënyrë të organizuar, duke i ndarë rolet dhe detyrat secili veç e veç janë marrë me kontrabandimin e migrantëve, të dëmtuarve Ali Velijudin, Fatih Fudejl dhe Xhemal Hamdi, shtetas Sirian dhe Mumin dhe Adil N. shtetas algjerian.

Gjithnjë sipas aktakuzës të pandehurit i kanë vendosur në motel restorantin “Astor”, organizojnë trafikimin e të dëmtuarve që përmes shtetit të Serbisë, t`i dërgojnë në shtetet e Evropës perëndimore, ashtu që për kundërshpërblim t`i japin nga 800 euro, për person duke ju premtuar se do të angazhojnë edhe policen Sonja Ristiq, për t`i përcjellur deri në kufirin me Hungarinë.

I pandehuri Blerim Rexhepi pastaj i ka dërguar në Bujanoc, tek stacioni i autobusëve, ku i ka pritur e pandehura Sonja Ristiq, e cila u ka lënë dy bileta të dëmtuarve Mumin dhe Adil, e të cilët më pastaj arrestohen nga policia serbe.

Janë interesante dëshmitë që kanë dhënë palët e dëmtuara, dhunën që kanë përjetuar nga policia serbe dhe të gjitha malverzimet e kryera nga ana e të pandehurve. Të premten janë dhënë fjalët përfundimtare të prokurorit dhe avokatëve mbrojtës dhe së shpejti pritet edhe të shpallet aktgjykimi.

Ndryshe tre të pandehurit ndodhen në paraburgim nga data 17 e 18 maj 2012./rajonipress/

Shpërndaje.
© RAJONIPRESS