Gjykimi i “Grupit të Gjilanit” rast për Strasburgun

Gjilan – Avokatët e Anamoravës vlerësojnë se gjykimi i Grupit të Gjilanit i përcjellë me shkelje skandaloze është rast për ta trajtuar edhe Gjykata e Strasburgut , meqë fund e krye është gjykim i montuar dhe me shkelje drastike të procedurave.

Edhe avokatët e Anamoravës e kanë dënuar gjykimin e Grupit të Gjilanit të cilët morën hiq më pak se 116 vite burg nga Gjykata Supreme e Serbisë. Oda e Avokatëve të Anamoravës e vlerëson proces të montuar dhe të motivuar politikisht.

Abdylaziz Sadiku kryetar i Odës së Avokatëve të Anamoravës tha për rajonipress se gjykimi që u zhvillua ndaj Grupit të Gjilanit është përcjellur me shkelje skandaloze të procedurave i cili meriton të trajtohet edhe nga Gjykatat e Strasburgut. “Ishte një gjykim fund e krye i montuar me shkelje të të drejtave të njeriut dhe për qëllim pati ta frikësojë tërë atë pjesë shqiptare e cila përkundër presioneve të vazhdueshme që ka bërë pushteti serb, po qëndron në vatrat e veta”.

Sadiku tha se është i befasuar nga kolegët serb në Beograd të cilët të paktën është dashur ta ngrenë zërin ndaj këtyre parregullsive gjyqësore që po bëjnë Gjykatat e atjeshme. “Anamorava ka mbledhur fakte e dëshmi të shumta kundër krimeve që janë bërë nga serbët gjatë luftës e të cilat janë dorëzuar në gjykatat e UNMIK-ut, EULEX-it , por edhe gjykatat vendore dhe asnjë dënim nuk është shqiptuar ndaj këtyre kryesve, përkundrazi Serbia dhe po këto gjykata serbe vazhdojnë t`i strehojnë këta kriminel, që ende mbesin të pandëshkuar”.

Sadiku u shpreh se jo vetëm familjarët e të dënuarve , por të gjithë duke përfshirë edhe avokat, jurist, ekspert të fushës juridike duhet të angazhohen që në mënyrë profesionale ta demaskojnë atë gjykim i cili u pa se ishte i ndikuar nga politika shtetërore e Serbisë tha Sadiku./rajonipress/