Gjykata Kushtetuese, me standarde të dyfishta

Intervistë me Glauk Konjufcën, nënkryetar i Lëvizjes “Vetëvendosje!” dhe shef i Grupit Parlamentar në Kuvendin e Kosovës.Për pushtetin pranohen rastet, opozita anashkalohet

“Gjykata jonë Kushtetuese, e kapur edhe atëherë, e ndikuar politikisht nga Qeveria edhe në atë kohë, pati refuzuar kërkesën për shqyrtim të Lëvizjes ‘Vetëvendosje!’ dhe kjo mendoj që ka qenë e ndikuar politikisht nga Qeveria, që të mos merret parasysh një lëndë, e cila është adresuar nga “Vetëvendosje!”. Tash, Gjykata Kushtetuese, për të njëjtën përmbajtje, po e pranon lëndën e presidentes. Atëherë kjo i bie që Gjykata Kushtetuese po vepron sipas standardeve selektive, jo që t’i trajtojë të gjitha palët njësoj”, është shprehur deputeti Konjufca

“Kosova Sot”: Ka kohë që nga opozita ka filluar një bllokadë e punës së Kuvendit të Kosovës, deri kur do të vazhdojë bllokada e Kuvendit?

Glauk Konjufca: Ne kemi aplikuar defunksionalizimin e Kuvendit të Kosovës për një arsye shumë të thjeshtë. Shkaku i kësaj krize politike duhet të gjendet në marrëveshjet e nënshkruara në Bruksel në mes të Isa Mustafës dhe Aleksandër Vuçiqit më 25 gusht të këtij viti. Marrëveshja e parë nga katër marrëveshjet me Serbinë, e arritur mes Isa Mustafës dhe Aleksandër Vuçiqit, dhe në anën tjetër Marrëveshja e demarkimit të kufijve mes Malit të Zi dhe Kosovës, e arritur në mes të Hashim Thaçit dhe Skënder Hysenit, si përfaqësues të Kosovës, në njëjtën anë dhe palës malazeze në anën tjetër. Të dyja këto marrëveshje, sidomos marrëveshja për krijimin e Bashkësisë së Komunave Serbe dhe demarkimi i kufijve, sipas analizës sonë që e kemi bërë si opozitë, përbëjnë shkelje shumë të rënda për shtetin e Kosovës. Këto marrëveshje e prekin sovranitetin e Kosovës dhe e prekin drejtpërdrejt territorin e Kosovës. Marrëveshja për Bashkësinë e Komunave Serbe e prek rregullimin e brendshëm territorial të Kosovës dhe e çon Kosovën drejt federalizmit. Kurse demarkimi i kufijve në mënyrën si është bërë po pretendohet që Malit të Zi i janë dhënë 8 deri në 10 mijë hektarë të territorit të Kosovës. Kryesisht janë shpatet e maleve, që i janë dhënë Malit të Zi dhe forcat malazeze kanë zbritur deri poshtë në rrafsh. Sa i përket tani anashkalimit të Kuvendit të Kosovës është për keqardhje se si Qeveria merr vendim, bën marrëveshje me Aleksandër Vuçiqin për ta anashkaluar Kuvendin e Kosovës dhe për ta krijuar Bashkësinë e Komunave me shumicë serbe vetëm me një dekret qeveritar. Ky është anashkalim i qartë i Kuvendit dhe këta janë ata që e kanë mbytur Kuvendin e Kosovës. Bllokimi ynë është dhe do të vazhdojë vetëm si kundërreaksion, si shprehje e pakë- naqësisë për këtë mbytje që ia ka bërë Kuvendit Qeveria e Kosovës dhe nuk do të ndërpritet derisa të plotësohen kërkesat e opozitës./kosova sot/