Gjukaj: S’ka falje të borxheve për veriun

Drejtori menaxhues i Korporatës Energjetike të Kosovës, Arben Gjukaj, ka hedhur poshtë mundësinë e aministimit të konsumatorëve të pjesës veriore të Kosovës që kanë borxhe për energjinë e shpenzuar elektrike.

Duke komentuar informatat e publikuara sipas të cilave faktorët ndërkombëtarët kanë hedhur idenë që në kuadër të planit për gjetjen e një zgjidhjeje për veriun e vendit Qeveria të ofrojë edhe faljen e borxheve që janë krijuar nga qytetarët e kësaj pjese të Kosovës për rrymën e shpenzuar, drejtori i KEK-ut tha se në asnjë rast nuk mund të bëhet fjalë për amnisti ndaj asnjë borxhi të konsumatorëve, përfshirë edhe ata të pjesës veriore të Kosovës.

“Nuk bëhet fjalë për amnistim. Qëndrimi ynë zyrtar është se nuk ka aministim për asnjë konsumator. Edhe në pjesën jugore nëse e marrim gjendjen në të gjitha enklavat, askush nuk është amnistuar.

Ka marrëveshje të cilat nënkuptojnë ngrirje të borxhit, por nëse çdo muaj nuk paguhet në mënyrë automatike u kërkohet borxhi i vjetër. Nuk ka aministim për asnjë konsumator dhe ky është qëndrimi zyrtar i KEK-ut”, ka thënë Gjukaj për “Kohën Ditore”.

Sipas tij, plani i vetëm i Korporatës Energjetike të Kosovës, i diskutuar edhe me konsumatorët e pjesës veriore, është integrimi i të gjithë konsumatorëve në shërbimet dhe sistemin e pagesave ndaj KEK-ut.

Shpërndaje.
© RAJONIPRESS