Gjilani përkujton me nderim dëshmorët e kombit

Gjilan – Me rastin e 5 Majit, Ditës së Dëshmorëve të Kombit, në Gjilan janë zhvilluar homazhe në kompleksin e varrezave të dëshmorëve, si dhe pranë varrit të Zija Shemsiu në fshatin Përlepnicë.

Në këtë ditë përkujtimore, përfaqësues institucionalë, familjarë të dëshmorëve dhe qytetarë u përkulën me respekt para sakrificës së atyre që dhanë jetën për lirinë e atdheut në të gjitha etapat e historisë kombëtare, nga rezistenca e hershme deri te lufta e Ushtrisë Çlirimtare të Kosovës.

Në mesin e të pranishmëve ishte edhe kryesuesja e Kuvendit Komunal të Gjilanit, Krenare Latifi Kçiku, së bashku me drejtorë komunalë, asamblistë, përfaqësues të subjekteve politike, përfaqësues të shoqatave të dala nga lufta dhe qytetarë të shumtë.

Aktivitetet u zhvilluan në një atmosferë nderimi dhe reflektimi, duke rikujtuar se sakrifica e dëshmorëve mbetet themel i lirisë dhe obligim i përhershëm për ta ruajtur dhe çuar përpara atë./rajonipress/