Gjermani e kosovarja, viktima të aksidentit në Kroaci

Zagreb – Në një aksident trafiku që ka ndodhur sot pak pas orës 7 të mëngjesit, në autostradën Zagreb-Split, kanë humbur jetën një shtetas gjerman 38-vjeçar dhe një shtetase e Kosovës, njofton gazeta online Veçernji list, në bazë të raportit policor.

Me shikimin e vendit të ngjarjes është konstatuar se aksidenti ka ndodhur kur shoferi i veturës KIA me targa gjermane ka humbur kontrollin dhe ka goditur një mburojën metalike, nga e cila pastaj është dëbuar prapa në asfalt.

Automobili pastaj ka goditur sërish mburojën metalike e në fund është rrasur në shenjën e trafikut. Nga fuqia e goditjes vetura është ndarë përgjysmë.

Trupat e viktimave, emrat e të cilëve nuk janë kumtuar, janë bartur në spitalin e Shibenikut, ku do të bëhet edhe obduksioni i tyre.