Gjendet trupi i pajetë i zhdukur dy muaj më parë

Pas gati plot dy muajsh, prej se nga familjarët e tij ishte lajmëruar si i zhdukur, të premten është zbuluar trupi i pajetë i një qytetari të moshës rreth 65 vjeçare, nga fshati Ramjan i Vitisë. Trupi i pajetë i tij është zbuluar nga disa bashkëfshatarë në një pus në afërsi të oborrit ku jetonte ai.

Komandanti i stacionit policor në Viti, Afrim Halili ka konfirmuar për gazetën Koha Ditore rastin dhe ka theksuar se qytetari Isa Rexhepi, i cili në PK më 11 prill 2012 ishte lajmëruar si i zhdukur, është zbuluar i vdekur në një pus në fshatin e tij.

Ai ka theksuar se thellësia e pusit dhe vështirësitë e tjera kanë bërë që për nxjerrjen e trupit institucionet e sigurisë dhe FSK të angazhohen me orë të tëra.

“Trupi i pajetë është marrë nga ana e Institutit të mjekësisë ligjore dhe në bazë të fakteve të para dyshohet se bëhet fjalë për vetëvrasje”, ka thënë Halili, duke shtuar se hetimet rreth këtij rasti do të vazhdojnë.

Shpërndaje.
© RAJONIPRESS