Gjilan – Në vazhdën e ligjëratave publike të organizuara nga Kolegji Universitar “Gjilani” si dhe në kuadër të programit të edukimit të publikut të Bankës Qendrore të Republikës së Kosovës (BQK), Guvernatori i Bankës Qendrore të Republikës së Kosovës, Gani Gërguri, ka mbajtur një ligjëratë para studentëve dhe personelit mësimdhënës të KU “Gjilani”.
Gjatë ligjëratës Guvernatori Gërguri elaboroi mbi rolin dhe aktivitetin e Bankës Qendrore të Republikës së Kosovës, si dhe diskutoi zhvillimet e fundit makroekonomike në vend e posaçërisht zhvillimet e lidhura me stabilitetin financiar.
Me këtë rast, Guvernatori theksoi arritjen e BQK-së në realizimin e objektivave që dalin nga Ligji mbi Bankën Qendrore si dhe vlerësoi lartë nivelin e stabilitetit financiar në vend.
Guvernatori poashtu njoftoi studentët me programin e praktikës për student që organizon Banka Qendrore e Republikës së Kosovës, si dhe lansimin e çmimit për ekonomistët e rinj, duke i inkurajuar studentët që të aplikojnë në këto programe të cilat për synim kryesor kanë ngritjen e njohurive praktike dhe nxitjen e aktivitetit hulumtues te studentët dhe ekonomistët e rinj./rajonipress/
