Gashi: Rugova edhe kundërshtarët i trajtoi me dinjitet

Deputetët e Lidhjes Demokratike të Kosovës, kanë reaguar ndaj kritikave që kohëve të fundit i janë bërë ish presidentit dhe kryetarit të LDK-së Ibrahim Rugova, duke thënë se personaliteti i Rugovës është jashtë personaliteteve të një partie politike.

Deputeti i LDK-së, Arben Gashi, tha se Rugova ka qenë dhe është një personalitet i cili arrit t’i japë dinjitet vendit të vet, siç është Kosova.

“Rivalët e dikurshëm politik, dhe rivalet e dikurshëm profesionalë, kanë arritur që sot ta diskutojnë në mënyrën me të ulët të mundshëm një personalitet të tillë. Nuk është e moralshme të trajtohet në mënyrë të tillë, një personalitet i cili edhe rivalët e vet i trajtoi me dinjitet”, tha Gashi.

Ndërsa, lideri i Vetëvendosjes, Albin Kurti, ka thënët se ngritja e politikanëve të Kosovës në politikë, është bërë në bazë të tri vendime kryesore, njëri në rrafshin ekonomik, dhe dy të tjerët politikë.

“Po e theksoj edhe një herë, me tri vendime janë ngjitur në karrierë shqiptarët në shekullin e fundit: duke e pranuar dhe zbatuar privatizimin neoliberal; duke hequr dorë nga bashkimi kombëtar; dhe duke i çarmatosur dhe demilitarizuar shqiptarët. Të gjitha këto karriera janë karriera të tradhtisë, të turpit, janë karriera të pabesisë, janë karriera që dëmtojnë brezin aktual dhe rrezikojnë brezin e ardhshëm”, tha Kurti.

Deputetja Alma Lama ka ngritur çështjen e mos miratimit të projektligjit për statusin e dëshmorëve, invalidëve veteranëve e tjerë, por edhe të grave të dhunuara. Madje, ajo ka lëshuar edhe një zë të incizuar në telefon se si një grua e dhunuar ka kërkuar nga deputetët që ta miratojnë ligjin për gratë e dhunuara.

Në këtë rast ka reaguar kryetari i Kuvendit të Kosovës Jakup Krasniqi, duke i thënë asaj se duhet ta bëjë dallimin dhe mos ta ngatërrojë detyrën e gazetarit me atë të deputetit, transmeton Kosovapress.

Në këtë pikë të rendit të ditës, deputetët ngritën edhe çështje tjera, që ishin me interes. /Telegrafi/