Gashi: Deklaratat e PDK-së, banale, absurde dhe të turpshme

Deputetja e Lëvizjes Vetëvendosje! Albana Gashi ka thënë se deklaratat e deputetëve të Partisë Demokratike të Kosovës për viktimat seksuale të luftës, Bekim Haxhiut dhe Shaip Mijës kanë qenë të turpshme.

“Deklarata e tij, është turpi i tij (Haxhiut). Është turp që nuk ka ndërmarrë asgjë deri më tash dhe për më tepër është absurde”, ka thënë Gashi.

Po aq të turpshme dhe aq absurde e ka quajtur edhe deklarimin e deputetin Muja i cili kishte kërkuar që të bëhet ekzaminim i viktimave.

“Deklaratat e deputetëve të PDK-së se këto janë raste të turpit janë deklarata banale. Në vend që të inkurajohen ato kategori, gra burra dhe fëmijë që janë dhunuar, ata i dekurajuan edhe më shumë”, ka thënë ajo në KTV.

Ajo i ka inkurajuar që personat që janë viktimë dhunimi të deklarohen.
“Këta persona, kategoria të cilat janë të prekur prej këtyre krimeve nuk kanë pse të ndihen të turpëruar. Turpi i takon Serbisë dhe atyre që nuk bëjnë asgjë që ta denoncojnë këtë punë”, ka shtuar ajo.

Kritika kryesore e PDK-së dhe atyre që votuan kundër kishte të bënte me financimin e këtij ligji. Sipas Gashit, nëse ka para të mjaftueshme për xhipat e qeverisë, drekat dhe darkat sigurisht që më e rëndësishme është që të sigurohen mjete për këtë kategori si më e ndjeshmja e shoqërisë.

“Në rastin e Kosovës nuk presim që të bëhen 20 mijë , por ne i inkurajojmë që të deklarohen sepse ligji është bërë për të mirën e tyre”, ka thënë ajo.

Ndërkaq, lajmin se ajo ka qenë në një takim me kryetarin e Skenderajt, Sami Lushtakun bashkë me deputeten e VV-së, Albulena Haxhiun, ka thënë se është i pavërtetë.
“Një takim i tillë nuk ka ndodhur as nuk do të ndodhë ndonjëherë. Lajmin e kam marrë vesh prej sekretariatit të medieve të Lëvizjes Vetëvendosje!. Këtë e ka shpikur dikush, meqë atë ditë Vetëvendosje!, kishte një aksion denoncues për shumë zyrtarë të PDK-së të cilët janë të dënuar dhe nën hetime”, ka përfunduar ajo./Indeksonline/