Ftesa e UP-së: Lajmërojini të gjitha abuzimet

Tek pas një jave Universiteti i Prishtinës ka reaguar për arrestimet e ndodhura aty. Arsye për vonesë dhanë analizimin e situatës me shumë kujdes.

Kështu Këshilli Drejtues i Universitetit të Prishtinës dhe menaxhmenti, të martën ka thënë se është duke e shqyrtuar situatën e krijuar pas arrestimeve të disa personave në këtë institucion, me dyshimin se janë marrë me veprimtari të kundërligjshme.

Madje ka ftuar krejt ata që dinë diçka për abuzimet në këtë institucion, të lajmërojnë në UP.

“Brenda kompetencave dhe kuadrit ligjor, jemi duke i shqyrtuar të gjitha masat e mundshmendaj gjithë atyre, që, në çfarëdo forme, janë përgjegjës për situatën e krijuar ose janë shkelës të drejtpërdrejtë të detyrave të punës. Udhëheqja e UP-së është e përcaktuar që t’i shkojë deri në fund zbardhjes së kësaj çështjeje”.

Në këtë kuadër, UP inkurajon të gjithë ata që kanë informacione shtesë për abuzime në Universitetin e Prishtinës, që të bashkëpunojnë me udhëheqjen e UP-së dhe me organet e drejtësisë, si dhe njëkohësisht kërkojmë nga drejtësia që të jetë e pakompromis ndaj atyre që janë pjesë e UP-së dhe që e kanë shkelur ligjin.