Fshatrat Cërnicë, Kravaricë, Gumnisht dhe Vrapçiq me kërkesa të shumta për investime kapitale në infrastrukturë

Gjilan – Në dëgjimin e dytë publik me qytetarë për buxhetin komunal 2023, banorët e këtyre fshatrave paraqitën problemet e mëdha nga mungesa e investimeve për shumë vite në projekte të infrastrukturës ka thënë Riad Rashiti.

Asfaltimi i rrugëve të këtyre fshatrave, mungesa e kanalizimit, mosfunksionimi i rrjetit të ujësjellësit, çerdhja për fëmijë, mirëmbajtja e rrugëve të asfaltuara, rruga për Kravaricë e kontraktuar për asfaltim vitin e kaluar por pa zotim të mjeteve, fusha sportit në Gumnishtë, kyçjet e banorëve në trafo të rrymës në Kravaricë, mirëmbajtja e lapidarit të dëshmorëve, rrjeti i ndriçimit publik në hyrje të fshatit, janë të gjitha këto kërkesa të arsyeshme të banorëve të kësaj pjese të Gjilanit.

Ne si komunë zotohemi dhe do të angazhohemi për ti hartuar këto projekte, në mënyrë që të kemi koston financiare për investime, pastaj të vlerësojmë se cilat janë mundësitë e komunës për të përshirë disa nga këto projekte në planifikimet buxhetore për vitet e ardhshme dhe për cilat projekte duhet të aplikojmë në ministritë përkatëse apo edhe donatorët potencial për të investuar në komunën e Gjilanit.

Gjilani ka tepër shumë nevojë për përkrahje financiare, në realizimin e projekteve të domosdoshme për t`i zgjidhur problemet e qytetarëve dhe të bizneseve të shumta që kanë kryesisht me infrastrukturë rrugore ka theksuar Riad Rashiti drejtor për buxhet dhe financa./rajonipress/

Shpërndaje.
© RAJONIPRESS