Forcohet bashkëpunimi për sigurinë në rajon: Kolonel Agron Rukiqi pret në takim Kolonel Sam Sargeant

Gjilan – Në funksion të avancimit të sigurisë dhe bashkëpunimit ndërinstitucional, Drejtori i Drejtorisë Rajonale të Policisë në Gjilan, Kolonel Agron Rukiqi, ka pritur në një takim pune Komandantin e Komandës Rajonale-Lindje të KFOR-it, Kolonel Sam Sargeant, i shoqëruar nga bashkëpunëtorët e tij.

Takimi, i zhvilluar në ambientet e Drejtorisë Rajonale të Policisë në Gjilan, u fokusua në çështje kyçe që lidhen me situatën aktuale të sigurisë, koordinimin operacional dhe thellimin e partneritetit ndërmjet Policia e Kosovës dhe KFOR.

Gjatë diskutimeve, të dyja palët vlerësuan se situata e sigurisë në rajon mbetet e qetë dhe stabile, duke theksuar rëndësinë e vazhdimit të koordinimit dhe bashkëpunimit në terren për të garantuar rendin dhe sigurinë për të gjithë qytetarët.

Me këtë rast, Kolonel Rukiqi shprehu mirënjohjen e tij për përkrahjen e vazhdueshme të KFOR-it, duke e cilësuar këtë partneritet si një shtyllë të rëndësishme në ruajtjen e stabilitetit dhe sigurisë në rajon./rajonipress/