Fletë më e votuara e Kamenicës, Besa Hoxha Krasniqi: Do të jem zëri juaj, në Asamble
Gjilan – Besa Hoxha Krasniqi është femra më e votuar në Kamenicë dhe më e votuara brenda LDK-së. Ajo ka falënderuar të gjithë elektoratin e saj dhe të LDK-së që i ka dhënë besimin që të jetë në ulësen e Asamblesë, derisa ka premtuar se do të jetë zëri i qytetarëve në trajtimin e problemeve dhe kërkesave të qytetarëve.
“Do të jem zëri i juaj në Asamble. Kështu e nis falënderimin e saj adresuar elektoratit Besa Hoxha Krasniqi. “Të nderuar miq, familjarë, kolegë/e, bashkëpunëtorë, simpatizantë, qytetarë të respektuar të Komunës së Kamenicës, tashmë KQZ-ja bëri publike rezultatet përfundimtare të zgjedhjeve lokale të 22 tetorit. Në bazë të këtyre rezultateve, kam dalë FEMRA (duke i kaluar edhe burrat ) më e votuar në Kamenicë e më e votuara brenda LDK-së, për Asamblenë Komunale” ka shkruar Krasniqi.
“Me këtë rast, dëshiroj të falënderoj të gjithë ata që na kanë mbështetur, të gjithë ata që ishin pranë nesh, ata që nuk e kursyen kohën e tyre, duke qenë përkrah nesh me aftësitë diturore e intelektuale, me vullnetin, angazhimin dhe bindjen e tyre për ta finalizuar përpjekjen tonë. Ju jemi mirënjohës përjetësisht dhe me respektin më të madh përulem para secilit nga ju, që ishit dhe mbeteni frymëzimi, motivimi, synimi dhe qëllimi i misionit tim për qenë zëri juaj, shërbyesi i juaj i devotshëm gjatë gjithë mandatit në Asamble. Të nderuar qytetarë të Kamenicës, me respektin më të madh përulem para jush dhe ju shpreh falënderimet zemërore për besimin e dhënë! Me konsideratën më të lartë për ju, qytetarë të mrekullueshëm të Kamenicës! E juaja, Besa Hoxha – Krasniqi./rajonipress/