Flet historiani Fitim Rifati: Autoriteti i Rrustem Behlulit ka reflektuar në ngritjen e vetëdijes kombëtare

Gjilan – Figura patriotike të Anamoravës, sikurse Rrustem Behluli, për shkaqe pothuajse të njohura kanë ngelur të anatemuara pas Luftës së Dytë Botërore. Rrustem Behluli i ka takuar plejadës së forcave vullnetare të Lidhjes së Dytë të Prizrenit. Duke qenë i orientuar në grupin e forcave shqiptare, të cilat kanë pasur për qëllim të ruanin trungun e atdheut dhe bashkimin e tyre me Shqipërinë, autoriteti i Rrustemit jo vetëm që ka reflektuar në ngritjen e vetëdijes kombëtare, por njëkohësisht edhe në rëndësinë e mbrojtjes së tokave shqiptare nga ripushtimi serbo-jugosllav më 1944 thotë historiani Fitim Rifati.

Në historiografinë shqiptare në periudhën e komunizmit, për ngjarje e personalitete shqiptare që kanë përfaqësuar interesat kombëtare të shqiptarëve përkatësisht luftën për liri e bashkim me Shqipërinë gjatë Luftës së Dytë Botërore, ka qenë e ndaluar të flitet e të shkruhet shprehet Fitim Rifati historian.

Rrustem Behluli i ka takuar plejadës së forcave vullnetare të Lidhjes së Dytë të Prizrenit. Duke qenë i orientuar në grupin e forcave shqiptare, të cilat kanë pasur për qëllim të ruanin trungun e atdheut dhe bashkimin e tyre me Shqipërinë, autoriteti i Rrustemit jo vetëm që ka reflektuar në ngritjen e vetëdijes kombëtare, por njëkohësisht edhe në rëndësinë e mbrojtjes së tokave shqiptare nga ripushtimi serbo-jugosllav më 1944.

Konsiderojmë se gjenerata e historianëve të Anamoravës në periudhën e pas Luftës së Dytë Botërore, për shkak të rrethanave politike dhe anatemimeve të sistemit komunist, deri në vitet ’90-ta ka qenë e shtrënguar dhe e detyruar të heshtë disa personalitete e ngjarje historike të kësaj treve shqiptare gjatë Luftës së Dytë Botërore.

Pas rënies së sistemit komunist dhe pas luftës së fundit në Kosovë, janë bërë përpjekje serioze nga historianët e Anamoravës, të cilët me kërkimet e tyre shkencore kanë sjellë rezultate të konsiderueshme për historiografinë e kësaj treve dhe kanë shtruar rrugën për hulumtime dhe studime të mëtejme.

Për të hedhur dritë mbi personalitete dhe ngjarje historike nuk mjafton vetëm grumbullimi i të dhënave përmes rrëfimeve të kujtimeve, por është e domosdoshme të hulumtohet nëpër arkiva për ç’gjë është e nevojshme përkrahja e institucioneve përkatëse, përfshi edhe ato komunale tha Rifati./rajonipress/