Fitorja duhet të fitohet – jo të dhurohet

Nga Ilir Demolli – Për mua, nuk do të ishte aspak befasi nëse Riad Rashiti shkon në balotazh, përkundrazi, befasuese do të ishte nëse kjo nuk ndodh. Sepse Riadi fitoren dhe votën po e kërkon drejtpërdrejt nga qytetari i Gjilanit, me një program konkret dhe projekte të zbatueshme, të cilat i ka prezantuar me seriozitet gjatë gjithë fushatës. Në çdo debat është dalluar për përgatitje, qartësi dhe përkushtim, duke dëshmuar se kësaj gare i është futur për të fituar, jo thjesht për pjesëmarrje simbolike.

Për mua, befasi për të keq kanë qenë dy nga kundërkandidatët e tij, Albani dhe Arbri, për të cilët pritjet e qytetarëve kanë qenë dukshëm më të larta. Siç u pa gjatë fushatës, të dy duket se i janë qasur kësaj gare me një komoditet të tepruar, duke u ndier favoritë “në letër”, me idenë se në fund vota do t’u dhurohet nga partia, njërit nga Kryeministri, e tjetrit nga ish-kryetari.

Kjo qasje ka bërë që të duken inferiorë në fushatë, pa një vizion të qartë dhe pa një program serioz qeverisës që pasqyron nevojat reale të qytetarëve dhe të Komunës së Gjilanit.

Prandaj, për të dy (Albanin dhe Arbrin), nëse nuk arrijnë të fitojnë pa balotazh, kjo do të konsiderohej humbje dhe ajo humbje do t’u shkaktohet falë Riad Rashitit.

P.S.
Shpresoj që Gjilani do të vazhdojë t’i befasojë me votë ata që nuk e marrin seriozisht qytetarin.