Fitore e mbijetesës për Dritën

Gjilan – Drita ka shënuar një fitore të vlefshme në ballafaqim me Vllaznimin e Gjakovës, të cilin e ka konkurrent të drejtpërdrejt në luftën për mbijetesë në elitën e basketbollit kosovar. Drita – Vllaznimi 88:79 (23:25, 26:24,20:16, 19:14).

Me këtë fitore, Drita është në pozitë më të lakmueshme dhe më e sigurt e pret fundin e kampionatit, ndërkohë që Vllaznimi tashti është një vend më poshtë në tabelë se sa ekipi gjilanas.

Në një lojë të barabartë në pjesën e parë, Drita ka qenë më e mirë në pjesën e dytë, kur është shkëputur në rezultat. Kanë qenë vendorët Dushica e F. Mehmeti që kanë shënuar numrin më të madh të pikëve, të pasuar edhe nga amerikanët Shningles dhe Agomo, derisa ndër mysafirë janë dalluar Idrizaj, që ishte koshashënuesi më i mirë i ndeshjes me 31 pikë dhe V. Gashi.

Palestra e Sporteve “Bashkim Selishta – Petriti” në Gjilan. Shikues: 500. Gjyqtarë: A. Hoxha, U. Hasani dhe H. Hasani. Pesë gabime personale: Idrizaj.

Drita: Fazliu, A. Mehmeti 6, Agomo 12, Shingles 12, Blackmon 8, Aliu, Bajraliu, F. Mehmeti 17, Ibrahimi 3, Hyseni 2, Dushica 27. Trajner Arben Bislimi.

Vllaznimi: Q. Gashi 11, Hana, V. Gashi 19, Rraci 10, Kaja, Juniku 3, Hajzeraj 5, Hoxha, Berisha, Idrizaj 31. /rajonipress/