Figura të politikës në krye të AKI-së

Presidenti i Kosovës Hashim Thaçi dhe kryeministri në largim Ramush Haradinaj janë dakorduar që pozitat boshe të AKI-së t’i plotësojnë me njerëz të politikës. Një vendim i tillë është marrë pavarësisht faktit që Ligji për AKI-në e thotë troç se punonjësit e Agjencisë së Kosovës për Inteligjencë nuk mund të jenë anëtarë të partive politike, shkruan sot gazeta “Zëri”.

Presidenti i Kosovës Hashim Thaçi dhe kryeministri në largim Ramush Haradinaj gjatë ditës së djeshme kanë emëruar Kreshnik Gashin drejtor të Agjencisë së Kosovës për Inteligjencë (AKI) dhe Burim Ramadanin në postin e inspektorit të përgjithshëm të AKI-së. Derisa Gashi kishte qenë sekretar i përgjithshëm në Ministrinë e Punëve të Jashtme në kohën kur ky dikaster drejtohej nga Hashim Thaçi, Ramadani ka shërbyer si zëvendësministër i Mbrojtjes gjatë qeverisë “Haradinaj”.

Ky i fundit në zgjedhjet e tetorit ka qenë edhe kandidat për deputet nga radhët e AAK-së, ndërkaq Kreshnik Gashi së fundi ka mbajtur edhe postin e kryetarit të Bordit të Autoritetit Rregullativ të Komunikimeve Elektronike dhe Postare (ARKEP). Në Nenin 129 të Kushtetutës së Republikës së Kosovës thuhet se Agjencia e Kosovës për Inteligjencë është politikisht e paanshme. Gjithashtu në Nenin 17 të Ligjit për AKI-në thuhet se punonjësit e AKI-së nuk mund të jenë anëtarë të partive politike.