FIFA nuk ndryshon vendim, në shtator miqësorja e parë

Prishtinë – Kreu i FIFA-s, Sepp Blatter, i ka rezervuar për më shumë se dy orë e gjysmë kohë delegacionit treanëtarësh të Federatës së Futbollit të Kosovës që kryesohej nga kryetari Fadil Vokrri, e ku ishin të pranishëm dhe nënkryetari Predarg Joviq dhe sekretari i përgjithshëm, Eroll Salihu.

Në takimin e radhës, FIFA – FFK, që të mërkurën u zhvillua në Zuerich, zyrtarët kosovarë kanë paraqitur idetë e tyre për mënyrën se si mund të zhvillohen ndeshjet miqësore të Përfaqësueses së Kosovës, bazuar mbi vendimin e marrë nga Komiteti Ekzekutiv i FIFA-s, më 22 maj.

Kryetari Vokrri, e gjitha që ka konfirmuar të mërkurën ishte vetë mbajtja e takimit, për të tjerat tha se ka rezervuar një konferencë për media pas kthimit në Prishtinë, të enjten (14:00).

“Për të qenë korrekt me të gjitha mediet, do të mbajë një konferencë të enjten për gjithë atë që u fol në takim”, ka thënë Vokrri. Takimin e ka konfirmuar dhe zyra për shtyp e FIFA-s, por nuk ka dhënë detaje.

Por, burime të gazetës pohojnë se në takimin në Zuerich, ku mori pjesë edhe komisioni për marrëdhënie me asociacionet nacionale të FIFA-s, u fol për modalitet të kësaj marrëveshjeje.

“Blatteri ka qenë i kënaqur me gjithë atë që është propozuar nga pala kosovare. Ai i ka garantuar FFK-së se vendimi për lejim të miqësoreve mbetet në fuqi, pa marrë parasysh reagimet nga federatat e ndryshme”, ka thënë burimi i gazetës në kushte anonimiteti.

Po sipas këtij burimi, Federatës kosovare i është dhënë leja për të nisur organizimin e ndeshjes së parë zyrtare miqësore dhe kjo ndeshje pritet të zhvillohet në fillim të muajit shtator.

Në të vërtetë, vetë FIFA ia pati ndaluar Kosovës zhvillimin e miqësoreve në verën e vitit 2008. Më parë, Kosova pati luajtur disa miqësore si me Shqipërinë apo Arabinë Saudite, por pas verës së vitit 2008, ka luajtur disa ndeshje me klube.

Pas shumë e shumë kërkesash dhe lobimesh, FIFA me insistim të vetë kreut të saj, Blatter, i lejoi Kosovës zhvillimin e miqësoreve më 22 maj të këtij viti, për çka ngjalli reagime të shumta.(koha)