Festë e letërsisë shqiptare në Vjenë

Nga Anton Marku, Vjenë – Në njërën nga sallat koncertale, pothuajse në qendër të Vjenës, të stolisur me flamuj kombëtar dhe plisa të bardhë, Lidhja e Shkrimtarëve dhe Krijuesve Shqiptarë në Austri “Aleksandër Moisiu” përmbylli edhe një vit të suksesshëm të veprimtarisë së saj.

Kësaj radhe, përpos anëtarëve të saj, këtë ngjarje e bëri edhe më madhështore pjesëmarrja e dy poeteshave të njohura nga Prishtina, Donika Dabishevci dhe Alketa Gashi-Fazliu.

Në fillim, të pranishmit i përshëndeti nikoqiri, Anton Marku, kryetar i Lidhjes së Shkrimtarëve dhe Krijuesve Shqiptarë në Austri “Aleksandër Moisiu”, duke i dhënë fjalën Ambasadorit të Republikës së Shqipërisë në Vjenë, Fate Velajt. Ambasadori, edhe vet shkrimtar, theksoi rëndësinë që ka arti në përcjelljen e mesazheve të paqes kudo në botë.

Aktiviteti letrar ishte e ndarë në dy pjesë. Në pjesën e parë në skenë dolën autorët shqiptarë nga të gjitha viset shqiptare në Ballkan, me banim në Austri. Kështu Violeta Allmuça lexoi poezitë “Njeri i dashuruar”, “Pas vetes” dhe “Gjakovë”, Kimete Krasniqi – Prebreza deklamoi vargje nga “Për këtë tokë – për këtë flamur” për t’i lënë radhën poetit veteran Zaim Toska, i cili recitoi poezitë “Veleshtes sime” dhe “Dëshmorëve të lirisë”.

Poetesha e re shkodrane Gabriela Mujaj mahniti publikun me ‘‘Pasqyrë” dhe ‘‘Polidhimtë” ndërsa kulmi artistik u arrit me interpretimin e Kimete Zahiti-Ternava të poemës së mirënjohur “Vranina” nga At Gjergj Fishta.

Në pjesën e dytë të mbrëmjes me librat e tyre së pari u prezantua Gjergj Kola me romanin “Bazilika e Gjergj Kastriotit”.

Një vështrim të shkurtër për librin për fëmijë të Angjelina Markut e lexoi Violeta Allmuça, duke e lënë vend autores që të lexojë disa fragmente të shkurtra nga libri i saj.

Ky eveniment u pasurua edhe me përmbledhjet me poezi “E gjithkoshmja andërr” të Donika Dabishevcit dhe “Gjarpëri i fqinjit” të Alketa Gashi-Fazliut.

E para u paraqit me një kumtesë dhe deklamoi vargje nga tri poezi nga libri, ndërsa e dyta iu përgjigj pyetjeve të bëra në një bashkëbisedim me udhëheqësen e programit, Kaltrina Durmishi, lidhur me motivet dhe inspirimin për të shkruar.

Performanca e të dy shkrimtareve të ardhura enkas për këtë eveniment nga Prishtina u duartrokit gjatë nga publiku i pranishëm.

Mbrëmjes i dhanë një sharm edhe më kombëtar këngët e interpretuara nga Blerta Ismajli, Mezzosoprano, shoqëruar në piano nga Vlora Melchard: |Ishte një ditë e muajit të majit”, “Tumankuqe” dhe “O vendi im”.

Publiku mirëpriti këtë manifestim letrar, i cili dëshmoi se edhe larg atdheut mund të promovohet kultura shqiptare, me fokus në letërsinë, me qellim të kultivimit dhe afirmimit të gjuhës shqipe në mërgatë.

Kryefesta e të gjitha festave të kombit, Dita e Flamurit, prapë bëri bashkë dashamirët e fjalës së shkruar, të cilët në vazhdimësi mbështesin autorët shqiptarë në Austri, duke i motivuar ata që të krijojnë vargje për vendlindjen, lirinë, dashurinë dhe jetën.

Lidhja e Shkrimtarëve dhe Krijuesve Shqiptarë në Austri ‘‘Aleksandër Moisiu’’ është themeluar në vitin 2011. Ajo është adresë e parë e krijuesve shqiptarë në Austri dhe pikë referimi për sa i përket letërsisë shqipe në këtë shtet. Duke u imponuar me një qasje serioze dhe kualitet në organizimin e më shumë se 70 orëve letrare dhe promovimeve të librave, ajo ka komunikuar në mënyrë shumë të frytshme me institucionet në nivel kombëtar, si Ministritë e Kulturës, të Arsimit dhe Diasporës, me Ambasadat e Shqipërisë dhe Kosovës në Vjenë, me shoqatat dhe individët e ndryshëm, etj.

Ajo po ashtu ka bashkëpunim shume domethënës edhe me organizatat austriake, sidomos me PEN Klubin e Austrisë dhe Lidhjen e Shkrimtarëve të Austrisë./rajonipress/