Festat nuk pakësohen

Qytetarët e Kosovës do të vazhdojnë të pushojnë ashtu siç kanë pushuar deri më tani për të gjitha festat zyrtare. Kjo për faktin se deputetët e Kuvendit të Kosovës, të premten kanë hedhur poshtë ndryshimet e propozuara nga Qeveria për reduktimin e datave të pushimit për festa.

Edhe pse Projektligji në tërësi ka marr 62 vota, sebep për bllokimin e tij janë bërë deputetët e komuniteteve pakicë të cilët gjatë votimit të dyfishtë nuk i kanë pasur votat e mjaftueshme. Për të kaluar ligji është dashur të jenë së paku 13 vota të tyre, ndërsa janë siguruar vetëm dhjetë.

Ky rregull kushtetues e ka bërë të pamundur, kalimin e dokumentit edhe pse janë ngritur dilema nga deputetët se duhet të rishikohet edhe njëherë çështja e votimit të këtij projektligji.

Me ligjin aktual, institucionet e Kosovës kanë pushuar gjatë një dite pune edhe kur festa e caktuar ka qëlluar të bie në ditë vikendi.(Tribuna)