Festa e Abetares përmbyllet me një ngjarje të veçantë për shkollarët e vegjël në Lladovë

Gjilan – Kaluan ditët, javët e muajt që nga fillimi i klasës së parë, ditës kur për herë të parë nxënësit e klasave të para u takuan me Shkollën për t’u nisur në një rrugëtim të gjatë drejt dijes. Shkronjë pas shkronje, numër pas numri arritën të shkruajnë e të lexojnë për bukuri fjalët e tyre më të ëmbla si: nënë, baba, gjysh, gjyshe, mësuese, shkollë e deri te krijimi i ngjarjeve të ndryshme kuptimplota.

E gjithë kjo punë u kurorëzua me Festën e Abetares, si ditën dhe ngjarjen më të veçantë për shkollarët e vegjël, e cila u mbajt më datë 16.06.2023, në ambientin e shkollës fillore “Agim Ramadani” në fshatin Lladove, me një program të përgatitur nga mësuesja Dashmire Ymeri në bashkëpunim me mësuesen Albulene Musliu.

Nxënësit para prindërve, gjyshërve e shumë pjesëmarrësve tjerë shfaqën pika të larmishme si: vjersha, këngë, vallëzime, lojëra ritmike dhe pjesë tjera interesante.

Me përmbylljen e mësimit të Abetares, shkolla po e përmbyll edhe vitin shkollor të punës së saj me mësimin e tingujve, shkronjave e numrave qindra yllkave e fatosave, gjeneratë pas gjenerate me të veçantat e tyre ashtu sikur këta artikulues të alfabetit dinë t’i japin melodinë më të ëmbël librit të parë.

Sot, nga kjo festë e madhe nxënësit e klasës se pare po hyjnë në një kapitull të ri të jetës së tyre, në universin e madh të dijes, në botën e madhe të librit e shkencës…
Kjo festë nga këshilli i prindërve të shkollës u cilësua si më e mira e mbajtur deri më tani./rajonipress/