Ferati: Trepça ka shërbyer për shpëlarje parash

Kuvendi i Kosovës po mbanë debat parlamentar lidhur me Ndërmarrjen Trepça, sipas kërkesës së Grupit Parlamentar të Lidhjes Demokratike të Kosovës. Sadri Ferati nga kjo parti ka kërkuar që brenda 90 ditësh qeveria e Kosovës të sjellë në parlament ligjin për Trepçën.

Ferati ka folur për të kaluarën e lavdishme të Trepçës, dhe kontributin kolosal të minatorëve dhe punëtorëve të tjerë të Trepçës. Ai ka thënë se për shkak të mungesës së investimeve Kosova nuk i shfrytëzon mijëra vende pune që do të mund të hapeshin.

Ferati ka hedhur dyshime lidhur me investimet në Trepçë, të cilat, sipas tij, lënë dyshime të bazuara se për 10 vjet në këtë institucion janë shpëlarë para, sepse, sipas tij, nuk ka pajisje të arsyetojnë shpenzimet e milionave që janë harxhuar aty.

Ndërsa Ministri i Zhvillimit Ekonomik, Besim Beqaj ka thënë se qeveria do të mundohet që punëtorëve të Trepçës t’u njihet stazhi i punës. Ai ka thënë se presin nga AKP-ja që t’u sjellin një plan në Kuvend dhe qeveri për shkak të kompetencave të limituara që Qeveria e Kosovës ka mbi Trepçën. /Telegrafi/