Fenerbahçe e pakënaqur me Berishën, e kërkon yllin botëror në vend të tij

Fenerbahçe nuk është e kënaqur me kontributin e Mërgim Berishës.

Klubi turk kishte pritur më shumë nga futbollisti kosovar, të cilin e kishte transferuar nga Red Bull Salzburgu.

Dhe, mediat turke raportojnë që klubi nga Stambolli tashmë e ka veçuar pasuesin e përfaqësuesit të të rinjve të Gjermanisë.

Sipas mediumit turk “Aksam”, gjiganti turk po planifikon ta shesë Berishën gjatë verës, përcjell “Gazeta Express”.

E në vend të tij, klubi Verdh e Kaltër do të mundohet ta transferojë yllin botëror, Luis Suarez.

Veterani i sulmit po i kalon muajt e fundit të kontratës me Atletico Madridin dhe nga vera do të jetë lojtar i lirë.

Për këtë arsye, Fenerbahçe do të mundohet “ta kapë” sulmuesin uruguaian, i cili mund t’i kryente shumë punë.

Suarez është i interesuar të vazhdojë të luajë në futbollin evropian dhe Turqia do të ishte një mundësi e mirë për ish-futbollistin e Ajaxit, Liverpoolit e Barcelonës.

Ai ka ofertë edhe nga klubi amerikan, Inter Miami, i cili është në pronësi të ish-futbollistit anglez, David Beckham.

Gjithashtu, interesim për Suarezin thuhet se ka shfaqur edhe klubi tjetër i njohur turk, Besiktas, shkruan “Gazeta Express”.

Suarez ka qenë pjesë e 40 ndeshjeve të Atleticos këtë sezon duke i realizuar 13 gola dhe i ka bërë edhe tre asistime.

35 vjeçari ka qenë njëri prej sulmuesve më të rrezikshëm në Evropë në dekadën e fundit. /Gazeta Express/