Fëmijët parashkollorë vizitojnë Policinë në Gjilan, mësojnë nga afër për sigurinë dhe rendin

Gjilan – Policia e Kosovës, përmes Stacionit Policor në Gjilan, ka mirëpritur një grup fëmijësh të institucionit parashkollor INTEGJ, të shoqëruar nga edukatorët dhe prindërit e tyre, në një vizitë edukative dhe ndërgjegjësuese.

Vizita kishte për qëllim afrimin e fëmijëve me institucionin e policisë dhe njohjen nga afër me rolin dhe përgjegjësitë e saj.

Fillimisht, fëmijët vizituan sallën e takimeve, ku u informuan për punën e policisë dhe rregullat bazë të trafikut, ndërsa më pas u shoqëruan nga zyrtarët policorë të njësisë për sektor dhe komunitet në ambiente të tjera të stacionit.

Gjatë qëndrimit, ata patën mundësinë të njihen me detyrat e përditshme të policisë, si dhe me pajisjet që përdoren në ushtrimin e detyrës. Aktiviteti u shoqërua me bashkëbisedime të hapura, ku fëmijëve iu ofruan këshilla praktike për sigurinë në shkollë, në rrugë, në familje dhe në hapësira publike.

Zyrtarët policorë theksuan rëndësinë e bashkëpunimit ndërmjet policisë, institucioneve arsimore dhe komunitetit, si një element kyç për ndërtimin e një ambienti të sigurt për të gjithë.

Policia e Kosovës mbetet e përkushtuar në vazhdimin e aktiviteteve të tilla edukative, me synim rritjen e ndërgjegjësimit dhe edukimin e brezave të rinj mbi rëndësinë e sigurisë, rendit dhe respektimit të ligjit./rajonipress/